بعد الهجوم الكبير على مطرب المهرجانات الشعبية عمر كمال من رواد السوشيال ميديا، كتب على صفحته الرسميّة عبر فيسبوك:” فيه رقم محطوط للحجوزات على الصفحة عشان الشغل والأفراح والحفلات، من أكتر المكالمات اللي بتيجي عاوزين شغل ومفيش شغل عندكم عشان إحنا محتاجين شغل، حاجة بتحسّسني بالحزن جداً لأنّهم شباب في سنّي، فبحب بين كل فترة والتانية أكتب بوست للناس فيه تشجيع”.
وتابع:” أنا شاب أخدت دبلوم صنايع وكمّلت دراسة مزيكا في معهد موسيقى العربيّة، ولما طلعت ملقتش فرصة أغنّي في الطرق العادية زي قصور الثقافة والأوبرا وكده، فقرّرت أعتمد على نفسي وأشتغل كل حاجة وحرفيّاً شمّرت واشتغلت ومشيت في كل الطرق اللي توصّلني لهدفي”.
وبسبب جدل واسع على تصرحاته بحسب موقع “صدى البلد”، أوضح: “كتبت بوست من المنطلق ده اللي هوا شيل شهادتك على جمب لو مشتغلتش بيها وانزل و شمّر وهات حلمك وهدفك وحقّقه، وحطيت صورة لتكريمات وجوايز نتيجة لنجاحي في مجالي، وطبعاً قصدي كل واحد في مجاله يجتهد مش يسيب شهادته ويروح يغنّى أكيد، إيه الغلط في كده يا جماعة”.