متابعة – لجين اسماعيل :
تزامنا مع إعلان نتائج الثانوية العامة بالأمس، حرص عدد من الفنانين على مشاركة الطلاب ذكرياتهم. من خلال منشورات عبر صفحاتهم الخاصة على مواقع التواصل الاجتماعي.
حيث نشر الفنان أحمد فهمي منشورا عبر صفحته على فيسبوك سخر فيه من مجموعه في الثانوية العامة، حيث إنه حصل على مجموع 99.8% فقال «مش عارف ده مجموعي فى الثانوية العامة ولا كنت بنافس ديتول».
أما الفنان أحمد أمين فشارك بنشر بوست عبر فيسبوك قال فيه «لما بفتكر ثانوية عامة بشكر الواحد في المية اللي مجاش.. لو كان جه معرفش كنت هبقى فين! فرقت معايا ع جزء من عشرة في المية.. عشان أدخل إعلام الكلية اللي كنت عايزها ساعتها.. فدخلت فنون جميلة.. واشتغلت في الصحافة لحد ما وصلت رئيس تحرير وأنا مش إعلام».
وتابع أمين قائلا «بعدها بقيت ممثل وأصحابي من فنون جميلة بقو فريقي اللي عملنا مع بعض البلاتوه..أنا عارف يوم النتيجة بتبقى زعلان أو فرحان علشان فاكر إن دي نتيجة مرحلة.. لكن الحقيقة إنها بداية مجموعة اختيارات كتير.. كلها ممكن توصل للنجاح عادي جداً.. أصل النجاح مش مرحلة من الدراسة».
وأضاف «ده مشوار كبير وطريق طويل وتغييرات كتير.. ممكن التفوق يبقى نقمة وممكن عدمه يبقى نعمة.. المهم هنكمل إزاي وهنختار إيه ،مبروووك من قلبي لكل الناس اللي طلعت نتيجتهم بغض النظر عن نتيجتهم.. مبروك عليك بداية اختياراتك!».
وشارك أيضا الفنان سامح حسين فقال فى منشور عبر الفيسبوك ” الثانوية العامة بعد مساء التفاؤل ومساء الخيرات ياجماعة مفيش بيت فى مصر مفيهوش ثانوية عامة أو البيت اللى جنبه حتى لو مفيش فى البيت دا أو البيت اللى جنبه فهيا حالة توتر عامة ان كل سنة فى المعاد دا حالة توتر عامة انا صاحي من النوم متوتر اتوترت”.
وتابع قائلا ” أنا اتوترت أكتر مكنت فى الثانوية العامة بتاعتى أيام النتيجة بتاعتى كنت قاعد بصطاد سمك وكان حلم حياتى أدخل هندسة وربنا موفقنيش ومدخلتش هندسة عيطت شوية وروحت كلت حواوشي ، دورت على حلم تانى وروحت كلت حواوشي على طول “.
