صرّح نجم المهرجانات حمو بيكا، بأنّ كثرة الهجوم عليه أدخله في حالة نفسيّة سيئة، فقال: “محدّش مستقصدني ولا حاجة، لكن كتر الهجوم عليّا جابلي حالة نفسيّة، أنا بقف قدام المراية أقول هو أنا بلطجي طيب ولا فيّا حاجة غلط؟ خلوني بقيت ماشي بكلم نفسي”.
وبحسب موقع “مصراوي” قال بيكا: المصنّفات عملولي محضر معرفش ليه، بيقولولي بسبب الفيديو اللي أنت عملته أنت وعمر كمال مع الراقصة لورديانة، طيب أنا طالع مع رقاصة عشان فيديو كليب أنا بصوره، وهي معاها تصريح إنّها رقاصة، ولما عملنا الفيديو راحوا عملولي محضر أنا وعمر رغم إنّها مش لابسة ملابس خليعة دي كانت لابسة هدوم خروج، طيب ما إحنا بنشوف أفلام كتير في راقصات ومحدّش بيعمل محاضر للممثّلين”، ذلك خلال مداخلة له مع الإعلاميّة لميس الحديدي مقدّمة برنامج “كلمة أخيرة”.
وقدّم بيكا الاعتذار للفنان هاني شاكر نقيب الموسيقيّين، قائلاً: “أنا بعتذر لأستاذنا الكبير هاني شاكر وبتأسّفله، وبتأسّف لأعضاء مجلس النقابة كلّهم، وأنا مكنش قصدي إنّي أعمل أي مشكلة، وأنا مكنش قصدي أعمل أي حاجة تزعل أستاذ هاني شاكر خالص، وأنا لو مكتوبلي أتحبس هتحبس، وربنا معايا في القضيّة، أنا عملت استئناف وربنا كبير ودي بلدي ومش ههرب”.
