أميرات “ديزني” وإطلالتهن المميزة المليئة بالأنوثة والحيوية هو حلم كل فتاة، فكل فتاة بداخلها أميرة، ولكن غالباً من يخجلن من ارتداء ملابس الأميرات في الشارع، خاصة وأنها لا تناسب تفاصيل الحياة اليومية، وهي المعادلة الصعبة التي نجحت مصممة الأزياء كريستين عاطف في حلّها، حيث تمكَّنت من تحويل إطلالات أميرات ديزنى الشهيرة من “سندريلا” لـ”سنو وايت” و”ياسمين” وغيرهن من الأميرات” إلى أزياء كاجوال عصرية تناسب الحياة اليومية.
وعن بداية رحلتها مع مجال الأزياء وتنسيق الملابس، قالت كريستين لـ” اليوم السابع”، “أنا خريجة إرشاد سياحي، وكنت بشتغل في مجال السياحة، لكن مع الوقت اكتشفت إنى بحب أنسق الملابس مع بعضها، وكتير من صحابى كانوا بيشكروا فى ذوقى فى اختيار الملابس، وده شجعنى أخد كورس فى مجال الستايلست والفاشون وبدأت أتفرج وأقرأ أكثر فى المجال ده، بتفرج وأشوف إزاي “البلوجرز”، بيلبسوا وأبتكر تصميمات أحسن وأفضل”.
وأضافت: “لاحظت فى الفترة الأخيرة إن معظم “البلوجرز “مهتمين بترند ديزني، ففكرت أكون مختلفة عنهم وأحول فساتين أميرات ديزنى للكاجوال”، ممكن تلبسه أى بنت، ولأنى بحب الشوبينج وبشترى هدوم كتير وألوانها مختلفة، فكان سهل عليا إنى ألبس كاجوال بنفس ألوان فساتين الأميرات “.
وقالت كريستين عن رد فعل متابعيها على مواقع التواصل الاجتماعى: “البنات والولاد كانوا معجبين جداً بالصور والستايل و شجعوني إني أكمل و ده شجعنى إنى أعمل شخصيات كرتونية تانية غير الأميرات، فقلدت ملابس السمكة دوري وبطوط، وده خلى أمهات كتير تشجعنى، عشان ولادهم كانوا فرحانين أوى بالستايل “.
وأكدت كريستين في نهاية حديثها أن أحلامها ليس لها حدود، وتسعى لتصل إلى أكبر عدد من الجمهور لتحاول تثبت موهبتها، فى مجال الفاشون، قائلة :”ناويه إن شاء الله أنزل بفكرة جديدة الفترة الجاية و هفضل مكملة فى مجال الفاشون و الستايلنج لحد ما أقدر أوصل لممثلين كبار و ليهم اسمهم”.
