أعلنت الفنانة المصرية ياسمين عبدالعزيز، اليوم الأربعاء، حبها للفنان المصري أحمد العوضي، وذلك في أول رد فعل لها على منشور شقيقها وائل عبدالعزيز، الذي أعلن فيه صراحةً رفضه لعلاقتها بـ”العوضي”.
ونشرت ياسمين صورة عبر حسابها الشخصي بموقع التواصل الاجتماعي “إنستغرم” تجمعها بالفنان أحمد العوضي، وعلقت عليها: “بحبك يا أحمد”، وذلك بعد نشر العوضى ذات الصورة، معلقاً: “بحبك يا ياسمين”.
وكان وائل عبد العزيز، شقيق الفنانة ياسمين عبد العزيز، أغلق حسابه الرسمى على موقع “فيسبوك”، بعد هجومه الحاد على شقيقته، بسبب رفضه لعلاقتها بأحمد العوضى الذي يصغرها بـ10 سنوات.
وقال وائل، في منشوره: “بصى يا ياسمين يا عبد العزيز يا أختى، أنا معاكى وفى ضهرك من وأنتى صغيرة شيلت مشاكل كتيًر بسببك من وأنتى عيلة صغيرة، بداية من مشاكلك مع الشاعر وبرادة وأنتى عارفة إن أنا أتأذيت فيها إزاى وقضية الشغالات مؤخرًا غير قضية الضرب اللى كانت بينك وبين بنت هشام سليم الممثلة اللى لبستيها التورتة فى وشها”.
وأضاف: “وقفت جمبك بكل ما أملك من قوة أدافع عنك فى كل موقف صعب مر عليكى ونسيت حياتى ونفسى عشانك وبقى كل همى أنا ووالدتك، إنك تكبرى وتبقى نجمة فى مجالك، سيبنالك اختياراتك كلها لنفسك ووفقنالك على معظم قراراتك وكنت الوحيد اللى ساندتك ووقفت جنبك فى طلاقك، لكن هنهرتل وتروحى تعرفى واحد أصغر منك بـ10 سنين لا من سنك وتتصورى صور مالهاش أى لازمة على حساب سمعتك وسمعتنا، لا ومحدش هيسمح، من أمتى وإحنا بنعمل أعياد ميلاد وتنزل على السوشيال ميديا، من أمتى الناس بتجيب فى سيرتنا؟ ونقعد نتعاكس على السوشيال ميديا؟.
وتابع شقيق ياسمين عبدالعزيز: “ومع ذلك حياتك وأنتى حرة فيها، أنا هتكلم على الشق اللى يخصنى، أنتى مقاطعة كل العيلة عشان تعملى اللى على مزاجك، إحنا دلواقتى وعايزين نفهم العلاقة دى إيه ورايحة على فين”.
وأضاف: “أما بالنسبة للأخ اللى ماشى وراكى فى كل حتة وشايفك البيضة الدهب اللى هتفقسله كل يوم.. أحب أقولك يا راجل لما تيجى تدخل بيت تدخله من بابه يا راجل!! وتقعد مع رجالة البيت!!.. دى الأصول وده الاحترام.. وطبعًا لأنك عارف أنك مرفوض رافضًا باتًا فاعمرك ما هتعمل ده ومعندكش غير طريق الشمال اللى أنت سالكه من سنين مع بنات الناس!!”.
وتابع: “أنا من رأيى كفاية عليك البطولة اللى أخدتها والعربية المرسيدس الهدية، وتركز فى شغلك وتسيبنا فى حالنا لأن طول عمرنا فى حالنا ومحدش سامع عننا حاجة وملوش لازمة جو الصور والمعاكسات ده وأنا مبخفش من تهديد حد”.
