متابعة – نغم حسن
حذفت الفنانة لورا منشورها حول علاقتها بابنتيها من الفنان شريف منير، فريدة وكاميليا، بعدما فضلتا البقاء مع والدهما بدلاً منها.
وكتبت لورا عبر حسابها الشخصي في إنستجرام: “شكراً لكل من دعمني نفسياً وحسّ بإحساس الأم، وبقول للقلة القليلة عديمي الإنسانية إن تعليقاتكم ما كانت سوى شوية تراب في الهوا”.
وأوضحت: “أنا قررت أشيل البوست لأن مش هسمح إن صفحتي تبقى ساحة لبعض المتطرفين دينياً، وبقول روحوا ناقشوا تطرفكم في حتة تانية”.
وتوجهت لورا برسالة قاسية لابنتيها تعاتبهما فيها على تركها والانضمام لعائلة جديدة، في أول تلميح لانفصالها عن شريف منير بعد زواج استمر 20 عاماً.
ونشرت لورا عبر حسابها إنستجرام مقطع فيديو يجمع ابنتيها مع والدهما شريف منير، وهم يتناولون الطعام في أحد المطاعم، قائلة: “رسالة إلى بناتي (فريدة وكاميليا).. بما إنكم خلاص قررتوا تبقوا مش في حياتي بعد ما اديتكم عمري وصحتي وحبي واهتمامي وضحيت عشانكم كتير!! وكل مدارسكم بمدرسينكم بدكاترتكم بأصحابكم بأمهات أصحابكم يشهدوا بإن أنا كنت أم عاملة إزاي! بقولكم مبروك عليكم عيلتكم الجديدة!”.
وتابعت: “وحقولكم حاجة واحدة بس! اللي مالوش خير في أمه ملوش خير في حد!! بتمنالكم كل خير وصحة وإن ربنا يهديكم في يوم من الأيام!! بس ربنا موجود وكبير قادر على اللي عمل فيكم كده إنه يرده ليه في يوم من الأيام!!! مامي لورا يمكن تكونوا نسيتوا اسمي”.
وعلقت فريدة ابنة شريف منير، على رسالة والدتها، قائلة: “ليه بتعملي كده؟ ليه بتخلي شكلنا كده قدام الناس؟”، لترد عليها والدتها لورا عماد، قائلة: “إنتوا بتموتوني كل يوم وأنتِ عارفة كده كويس، ربنا يهديكي، صحيح الزن على الودان أمرّ من السحر”.
وقالت كاميليا: “عمرنا ما بعدنا عنك، وغير كده أنا كنت لسه قاعدة معاكي امبارح ومكنتش عارفة إنك بتفكري في كده”، لترد عليها والدتها قائلة: “إنتم عارفين كويس أوي إني بشحتكم وبتهربوا مني، ربنا موجود ويهديكم من الزنّ اللي على ودانكم”.
