متابعة: روان ديوب
أشار الفنان أحمد العوضي إلى أن أي تصريحات بشأن الوضع الصحي لزوجته الفنانة ياسمين عبد العزيز ستكون عن طريقه هو فقط وليس عن طريق أحد آخر.
وكتب أحمد العوضي عبر حسابه بـموقع التواصل الاجتماعي “فيس بوك”. قائلاً: “يا جماعة بعد إذنكم أي تصريح عن الحاله عن طريقي فقط. وأنا مقلتش أي تصريح عن حالة ياسمين غير أني طلبت منكم دعواتكم وتمنياتكم لها بالشفاء العاجل شكرا ليكم”.
وأضاف: “هي في الرعاية دلوقتي ومحتاجه دعواتكم.. دي كفايه إنها تهون عليها”.
ويشار إلى الفنان أحمد العوضي كشف مؤخراً عن مرور زوجته الفنانة ياسمين عبدالعزيز بأزمة صحية. وذلك عبر حسابه بموقع التواصل الاجتماعي “فيسبوك”. قائلاً: “يمكن ببان قدامكم دايمًا قوي، لكن الحقيقة أنا دلوقتي أضعف إنسان على وجه الأرض عشان أنا روحي مش معايا”.
وتابع: “أنا ضعيف جدًا من غيرك إنتي لازم تبقي كويسة ولازم تقومي بالسلامة. أنا لأول مرة أكتب من غير ما أكون مفكر أنا بكتب إيه وهكتب إيه؟، بس إنتي هتقومي إن شاء الله بإذن الله عشان إنتي وعداني وعد وهتنفذيه”.
وأضاف: “أنا عاوزك تبقي كويسة وتقومي عشان أقولك إني لو كنت ببينلك إني بحبك مرة فالحقيقي واللي جوايا إني بحبك ألف مرة. وأنا دلوقتي مش قوي زي ما إنتي بتشوفيني أنا دلوقتي ضعيف ضعيف جدًا لحد ما تقوميلي تاني عشان زي ما إنتي بتاخدي قوتك مني أنا كمان باخد قوتي منك”.
واختتم العوضي رسالته لزوجته ياسمين عبدالعزيز قائلاً: “قومي عشان أنا بحبك، بحبك أكتر بكتير من كل الكلام اللي أنا كتبته. أكتر بكتير من كل اللي عدينا بيه مع بعض من أيام حلوة ومواقف صعبة مرت علينا، أكتر بكتير حتي من الموقف اللي احنا فيه دلوقتي، أنا بحبك”.
وطلب الفنان أحمد العوضي، من جمهوره ومتابعيه ضرورة الدعاء لزوجته ياسمين عبدالعزيز. بقوله: ‘ادعولها تقوم بالسلامة زي ما إنتو دايمًا بتدعولها بالنجاح والتوفيق، هى دلوقتي محتاجة دعواتكم”.
