متابعة : رهف عمار
هاجم حسام حبيب والده عقب أزمة التسجيل المسرب مؤخرا، إذ قال «أنا مش همشي ورا حتة إنه بينكر ولا مبينكرش وصوته ولا مش صوته أنا ميخصنيش الكلام ده، أنا عندي مشكلة في الثقة في الناس اللي حواليا والشخص ده مش أول مرة يأذيني، وأنا آسف أني بقول الشخص ده».
وأضاف حسام عبر فيديو بثه على موقع إنستجرام، «أنا مش عايز حد يزعل مني على أني بقول الشخص ده لإن صعب جدا، صعب أقول الاسم العادي بعد اللي قاله واللي بيعمله، أيا كان حد جرجره أو حد سجل له أنا عندي تسجيل أن صاحبة الموقع زقت عليه البنت 6 شهور».
وتابع «حسام» أن الفتاة التي ظهر صوتها في التسجيل المسرب «مزقوقة» من أقرب الناس له ولزوجته شيرين عبدالوهاب.
حيث أعلن الفنان حسام حبيب قطع علاقته بوالده، عقب تسريب مقطع صوتي له، كما أعلن المطرب أنه بصدد اتخاذ الإجراءات القانونية ضد كل من أساء إليه مهما كانت درجة قرابته.
وتصدر اسم المطربة شيرين عبدالوهاب، خلال الساعات القليلة الماضية، مؤشرات البحث على «جوجل»، بعد انتشار تسجيل صوتي لوالد حسام حبيب، يتحدث فيه عن خطة ابنه حسام للزواج منها لاستغلالها والاستفادة من ثروتها.
وتضمن التسجيل المنسوب لحسين حبيب، والد حسام حبيب، عددًا كبيرًا من التصريحات التي قال فيها: «ابني حسام بيتحكم بجميع حسابات شيرين عبدالوهاب وبيسحب كل ما يشاء من أموالها، وأيضا حسام ووالدته مبيحبوش شيرين عشان هي كمان كانت ترغب في الطلاق منه».
وأضاف: «حسام متزوج منها وبيشتغل معاها مدير أعمالها من المفروض بقى أنه يكون له نسبة من الأرباح مثل نسبة مدير أعمالها القديم ياسر خليل، أنا عارف حسام ابني دماغه سم وهو ذكي جدًا ومش سهل، فأكيد هو في دماغه حاجة ومأمن بنفسه جدا، وشيرين عاملة لحسام توكيل بدليل أنه معاه الفيزا بتاعتها وبيقدر يسحب من حسابها، وعارف الرقم السري، بس هو بيروح يسحب الفلوس اللى هو عايزها بس».
واختتم تصريحاته: بأن «إيمان أم حسام مش بتحب شيرين، إيمان تنكة، وعاملة زي المليونير لما يفلس هي صرفت الفلوس اللي أبوها سابهالها وصرفت فلوس حسام، شيرين عايزة تقولها بتتنكي على إيه؟ ده أنا عزماكي وهتسافري على حسابي والفندق على حسابي».
ورد والد حسام وفقا ل«الوطن»، قائلًا: «إن تسريب التسجيل الصوتي ليس الغرض منه إلا حدوث أزمة بينه وبين زوجة ابنه، والموضوع قديم وانتهى، وأن علاقتهم جيدة».
علقت الفنانة شيرين عبدالوهاب، على التسريب الصوتي، قائلة: «حسام ربنا هو اللي بعتهولي، فربنا مش بيعملي حاجة وحشة، حسام بيحبني أكتر من نفسه، أنا وبناتي، بدليل إنه من ساعة ما اتجوزني ما استفدش بأي حاجة ومعملش لنفسه أي حاجة.. هو عايش بس عشان يخاف عليا وعلى عيالي من كل شيء.. وفيه حاجات كتير مفروض إن ماردش عليها، الست حماتي اللي ربت راجل أخلاقه عاملة كده، لازم تكون ست عظيمة، فحسام إنسان عظيم وأمه ست عظيمة.. وأتمنى منكم تدعو لنا بالذرية الصالحة.. وبقول لكم مفيش أي حاجة من دي خالص.. إنسان نقي ونضيف وربنا بعتهولي».
