بعد صدور قرار قضائي بحبسها لمدة 3 سنوات بتهمة تحرير شيك بدون رصيد لطليقها الفنان أحمد سعد، كشف الأخير عبر حسابه على “انستغرام” أنه لم يكن على علم بأن المحكمة لا تزال مستمرة، ووصلت إلى حد إقرار سجن الخشاب وفرض غرامة مالية عليها.
وفي رد ناري من سمية الخشاب على ما قاله طليقها مبرراً، كشفت في مداخلة هاتفية لبرنامج “القاهرة الآن” ملابسات عدم وجود رصيد لها في البنك قائلة:«أنا عندي تعاملات مع أهم 3 بنوك في مصر، وعمري ما طلعت شيك وحد أخد رفض عليه لكن هو راح في وقت مفيش فيه فلوس، وأخد رفض على الشيك، وكنت قلت له معلش أستأذنك، أنا برة مصر، ولما أعمل إيداع قدم الشيك».
وأشارت إلى أنه كانت هناك مفاوضات بين الطرفين بتدخل عدد من الوسطاء، وقالت:«حصلت مفاوضات، مع ناس وسطاء خير، وقعدنا اتكلمنا كلام رجالة، إحنا مش بنهزر، أنا احترمت كلام الرجالة، لما قالوا وافقي وكفاياكي وجع قلب، وقلت لهم كلامكوا على راسي».
وتابعت:«الفلوس بتروح وتيجي وإحنا اللي بنعملها، لكن الأهم هو دمي، مش فاهمة يعني إيه واحد اتسبب إني استئصلت طحالي عشان هو واحد مستهتر، قطة أنا ضربتها بعربيتك وكملت عادي؟ ويقول الطحال أصلًا ملوش لازمة».
وعلقت على بيان الفنان أحمد سعد الذي ذهب فيه إلى أن هذا الأمر ناتج عن خطأ إجرائي قائلة:«معقول المحامي بتاعك هياخد إجراء من غير ما يقولك؟».
وكشفت سمية عن مفاجأة كبرى مؤكدة أن أحمد سعد قام بتحرير محضر مطالبا أن تحرر تعهد بعدم التعرض له، وقالت:«أنا أعملك تعهد بعدم التعرض؟ يا خبر إسود أنا اللي هتعرضلك؟ ده إنت اللي بتبلطج وتهدد وقلت هدي لواحد مليون جنيه، الواحد ده هيعمل إيه؟ هيخطفني مثلًا عشان يمضيني على شيكات ولا هيموتني؟ إيه شغل العصابات بتاع الثلاثينيات ده الكلام ده قدم من أوي يا أحمد؟».
وأردفت:«هطالب بكل حقوقي وأهمهم دمي، وأنا واثقة في ربنا والقضاء المصري».
وأوضحت أنها قررت عدم التنازل عن حقوقها في الخلاف مع الفنان أحمد سعد، مضيفة: «قضيتي مش قضية سمية الخشاب الفنانة، اللي بينها وبين طليقها مشكلة، لأ، دي قضية كل ست مصرية وعربية، بتتعرض للإهانة والعنف، وبيتضغط عليها، مش بتكلم عن سمية، لكن عن حالة ستات كتير جدًا بيعانوا منها».
يذكر أن أحمد سعد صدم المتابعين بردة فعله على قرار حبس طليقته وكتب:« برغم كل ما أثير حول الأزمة الحالية للفنانة سمية الخشاب والتي حدثت عن طريق خطأ إجرائي ودون علمي وأنا الآن خارج مصر… أوضح وفقط للحق ومهما كانت الخلافات أنه بالفعل تمت التسوية والاتفاق علي التسوية بنفوس راضية».
متابعاً:«إلا أنني تفاجأت بالأخبار من خلال الإعلام وتم فورا تصحيح المسار متعاليا عن أي إساءة أو ترويج لأكاذيب عارية تماما من الصحة ولكن للاسف دأب علي ترويجها إعلام الفلس والإثارة، فقد عاهدت الله على عدم الإساءة والافتراء مهما كانت الظروف، وسيعلم الذين ظلموا أي منقلب ينقلبون».
