بكى الفنان حمادة هلال بشدة، أثناء استضافته في برنامج “واحد من الناس” تقديم الإعلامي عمرو الليثي المذاع على قناة الحياة. عند سؤاله عن والدته وقصة مرضها قائلاً: “الله يرحمها عاشت حياة صعبة أوى وكانت ضهر أبوية في كل حاجة.. وكانت مممكن متاكلش عشان أحنا نتعلم وعلمتني أزاي أحافظ على النعمة وأزاي أحب أخواتي وأحافظ عليهم”.
https://www.facebook.com/AlHayah1TV/videos/3247572691958088
وتابع هلال: ” أمي فضل عندها مرض السرطان 3 سنين. ومكنتش تعرف لأني محبتش أعرفها. وده اكتشفناه لما قالتلي صدرها واجعها. ولما روحنا للدكتور فقالي أن عندها سرطان. وطلب نعمل تحاليل وللأسف لقينا السرطان في كل جسمها”.
وأضاف: “وطلبت من كل اللي موجودين في المركز أن يفهموها أنها بتتعالج من هشاشة عظام بسيطة. وان كل اللي بتاخده فيتامينات. ولما قالي هاندي كيماوي ولكن رفضت وقلتله شوف البديل فقالي الهرمونات والأدوية الذكية. وفعلا بتروح تاخد العلاج. وتقولي أنا حاسة أنى تعبانة فكنت بفهمها أن ده لازم عشان الأدوية”.
https://www.facebook.com/AlHayah1TV/videos/352228852778684
واستطرد: “بعدها بشهرين والدتي تعبت تاني والدكتور قالي أنا مضطر أديها كيماوي ولما حصل لقيت شعرها بيقع فقعدت أفكر في أي فكرة وفهمتها أن دي صبغة حطيناها بس وقعت شعرها وصدقتني لأنها كانت بتصدقني في أي حاجة، وأنا مكنتش بكذب عليها ولكن عشان كان نفسي تقعد معايا أطول وقت ممكن”.
وأضاف حمادة: “ربنا متعبهاش في آخر لحظات حياتها ولكنها دخلت في فترة غيبوبة وتحس أنها زى أكنها بقت طفلة ومش بتاكل غير فاكهة ومش حاسة بطعم أي حاجة، وكنا خايفين نوديها المستشفى بسبب الكورونا وبعد فترة روحنا المركز الطبي العالمي، ولكن جالي إحساس أن هي خلاص ماشية وروحت كلمت حد قلتله هاتلي كفن واخواتي ومراتي استغربوا جداً”.
ولفت إلى أنه حدثت مشادة بينه وبين ممرضة كانت رافضة دخوله على والدته إلى أنه أخبرها بأنه يريد توديع أمه، وبعد جلوسه مع والدته روى لها الكثير من الحكايات والذكريات ولكنه لم تكن معه وبعد ذهابه للمنزل تلقى هاتف يخبره بالوفاة.
واختتم حديثه: ” أمي كانت موصياني طول الوقت على أخواتي البنات وزوجتي لأنها كانت بتحبها عشان حنينه عليها أوى، ويارب يجمعني بيها في الجنة، ويارب يبارك لكل واحد أمه عايشه ويحافظ عليها وياريت كل وقت قاعد معاها متركزش في الموبايل وركز معاها هي وأملى عينك منها وحوش جواك هي فين لأن هايجيلك لحظة بعد الشر هتتمنى الوقت ده”.
و الجدير بالذكر، طرح النجم حمادة هلال أغنيته الأخيرة بعنوان “طحن في طحن”، وذلك على قناته الرسمية على موقع الفيديوهات “اليوتيوب”، والأغنية من توزيع أوكا وألحان حسن سراج، وكلمات هشام عبد الحليم، ويقدمها بشكل جديد عن أعماله السابقة وتحمل العديد من المفاجآت.