متابعة – خالد الديب

قدم المطرب رامي صبري اعتذاراً، عن أزمة أغنية “شكراً”، عبر ستوري حسابه الرسمي على موقع التواصل الاجتماعي “إنستجرام. وفقاً لـ”ET” بالعربي.

وكتب صبري، على حسابه قائلاً: “احقاقاً للحق وكل واحد ياخد حقه اغنية شكرا للفنان الكبير عمرو دياب أنا  فعلا كنت شغال فيها لكن الأغنية مش ملكي قانوني يعني مثلاً محدش خد مني حقوق أو مقابل مالي أو اخدت تنازل رسمي علشان بس أبرّأ تامر حسين وعزيز الشافعي من الحتة دي وعزيز الشافعي انت ملحن كبير ونجحنا سوا متزعلش من كلمة اتقالت في زعل واحنا داخلين على أيام مفترجة وكلنا خدنا عين، ومن ساعة ما لحنت وكتبت حياتي مش تمام واحنا مش تمام وحبيبي يا عزو وحبيبي يا تامر يا مدعي يلا حصل خير”.

من جانبه رد عزيز الشافعي على رامي وكتب قائلاً: “الحق أحق أن يتبع ، حصل خير يا رامي و انت فنان حقيقي  ومباردة جميلة منك إنك توضح للناس الحقيقة \، والاعتذار من شيم الكبار وانت كبير ، واحنا في الأول و في الآخر زملاء مهنة واحدة وبفخر جداً بنجاحنا سوا والعلامات اللي عملناها. وبتمنالك دايما النجاح والتوفيق في كل شغلك وفي تقدم دايما يا نجم  وشكراً على كلامك الجميل”.

توضيح الحقيقة للجمهور

من جهته رد تامر حسين علي رامي وكتب قائلاً: “هو ده رامى صبرى اللى أنا أعرفه، كان يهمنى توضيح الحقيقة للجمهور المحترم اللى البعض منه تخيل إننا ممكن نعمل تنازل لأى فنان أو ناخد مقابل وندي الأغنية لمطرب آخر، وكنت حزين ومأذى نفسياً من الموضوع ده وحقك عليا لو اتكلمت فى البرامج بحدة شوية فى الكلام أو اتكلمت بلهجة مش لهجتى معاك ولا مع أى زميل بس ده من زعلى إنك موضحتش كل ده  ببوست وتبرأ  ذمتنا وسمعتنا واحنا فعلاً داخلين على أيام مفترجه، وفي كل البرامج  قلت إنك أهم صوت فى جيلك ما أنكرتهاش وربنا يوفقك ويكرمك ويبعد عن الجميع أى خلافات ومشاكل عايزين نفن ونسعد الناس المحترمة اللى بتثق فى ذوقنا فنياً. ونستغل الوقت فى النجاح وبس مش مستاهله خصام وزعل  الناس بتموت وحصل خير وأسرتك الكريمة فوق راسى. وملهمش علاقة بمشاكلنا اللى انت بتورطنا فيها أون لاين.

في سياق متصل، أوضح محامي محامي عزيز الشافعي محمد السباعي، في تصريحات صحفية، أن الإجراءات القانونية ما زالت مستمرة، بناءً على طلب عزيز الشافعي وتامر حسين، وأنه غداً أو بعد غد سيتم البت في دعوى التعويض والتي تبلغ 2 مليون جنيه، ولابد أن يحقق الأمر الجدوى الإيجابية منه وهو عدم الاعتداء على حقوق الآخر. وأن الإعتذار على “فيس بوك” بدون فائدة، ولابد من وجود إجراء رسمي. ويوجد بلاغ قدم في نقابة الموسيقيين. مؤكداً أن عزيز أخذ الأمر من الجانب الإيجابي.