أرسل الرئيس المصري عبد الفتاح السيسي، اليوم، الأحد، مجموعة من الرسائل الهامة خلال افتتاح مجمع التكسير الهيدروجينى في مسطرد في محافظة القليوبية، ضمن افتتاح عدد من المشروعات القومية، والتي ركز خلالها على أهداف هذه المشروعات، والهدف منها في المقام الأول، هو التسهيل وتخفيف العبء عن كاهل المصريين.
“في ناس بتصطاد في المية العكرة”
لفت الرئيس المصري إلى وجود مجموعة من الناس كل هدفها التشكيك في المشروعات التي تتم وبث الشائعات والفتن بين المواطنين، وتابع: “فيه ناس موجودة وكل هدفها التشكيك ويخوفوكم بيطصادوا في المية العكرة..لما تحركنا وبدأنا في خطة شرق العاصمة بالكامل قالوا بيعمل لصالح مصر الجديدة ومدينة نصر.. مفيش كلام من ده فيه حاجة لصالح الناس”.
وأضاف: “الحركة 3 ملايين سيارة خلال اليوم أحنا بنرحمهم بحركة كويسة سهلة واقل تكلفة في الوقت والوقود.. مبنعملش إجراء ألا في إطار خطة متكاملة للدولة لمعالجة أثار صعبة، اللي بتشوفوه ده بقولها للإعلام والمواطنين هو ده الحال، نصلحه ولا نسيبه؟، نصلحه طيب نصلحه على حساب الناس ولا حساب الدولة، والدولة في الأخر شعب مصر”.
“رهاني على المصريين كسبان”
وأوضح السيسي، أن هناك من يستغل المواقف الصعبة من أجل تشكيك المصريين في ما يتم تنفيذه على أنه على حسابهم وضدهم متابعا: “رهاني على الشعب أنه متفهم ومقدرين وتتحملواما يتم تنفيذه.. واللي بيتعمل بيتعمل بالمصريين.. هي الدولة حاجة وشعبها حاجة تانية.. الدولة والشعب حاجة واحدة.. أحنا بنجري وأنا رهاني على الناس.. والحمد لله رب العالمين.. خلال السنوات الماضية كان الرهان كسبان”.
“دلوقتي بشكر الناس”
أشاد الرئيس المصري، بوعي المواطن المصري، قائلاً: “أنا دائما بقول لكم أنا براهن على الناس، دلوقتي بقولكم انا بشكر الناس”
وأضاف:”ده رهان عليكم أنكم قادرين وبتتحملوا.. الشعب والدولة حاجة واحدة ومحدش يقدر يدخل بيننا”.
وتابع السيسي: “بنصلح في الأرض.. لو بفسد في الأرض هبقى خايف لأن مش هيبقى معايا ربنا.. وأن الناس نحن نعمل في مسار إصلاح وتنمية وتعمير لأن الدولة تحتاج إلى هذا.. الإصلاح الاقتصادى لم يكن سهلا.. وبفضل الله عدينا منه وحققنا انجازات الدنيا كلها ببتكلم عليها.. وأنا بقول “بفضل الله” وقدرنا نواجه الاقتصاد المعثر والسياحة وغيرها”.
“منحة العمالة غير المنتظمة محتى نهاية العام”
وجه الرئيس المصري، الحكومة باستمرار تقديم المنحة للعمالة غير المنتظمة حتى نهاية العام الجاري.
وقال: “طالما أتكلمت عن العمالة غير المنتظمة مش أدينا 3 شهور، طيب أنتوا هتكملوا لأخر السنة ولا إيه.. الناس ظروفها صعبة.. فلو كان كده نكمل لغاية أخر السنة”.
“أحنا ماشيين في مسار الإصلاح الحقيقي”
شدد الرئيس المصري على تعطل الكثير من المشروعات وخروجها عن الخدمة نتيجة عدم الاستقرار، وتابع: “مشاريع كتير وقفت في الدولة بسبب عدم الاستقرار.. وتعرضت للانهيار أو تعرضت لخسائر كبيرة.. وأتخصمت من الناتج المحلى من الدولة.. وبقت أصحابها في مديونية.. ونحاول نحل المسألة دي.. وفرنا 100 مليار جنيه .. من أجل تعويض أصحاب المشروعات”.
وتابع: “بقول تانى لكل المصريين والإعلاميين والمثقفين والبرلمان الحالى والبرلمان القادم.. ومجلس الشيوخ.. كل حاجة مبنية على الاستقرار والأمن.. عملت الأمن والاستقرار هيجبلك المستثمرين.. البلد دي مستقرة ونقدر نحط فيها مشاريع.. ولو مفيش استقرار منقدرشى.. وتقدر عجلة الاستثمار لعشرات السنين وتتطور الدولة”.
وأكد السيسي: “الناس محدش يقدر يخدعهم بالكلام.. وأحنا ماشيين في مسار إصلاح.. والناس تتفهم ده وتتحمل التكلفة” متابعا: “بفضل الله الناس بتتكلم عن مصر “بسم الله ما شاء الله”.. ورغم اللي بيحصل في العالم في ظل توقف حركة السياحة.. وتأثر حركة التجارة الدولية.. ومصر فضلت بخير علشان ربنا.. وبخير علشان شعبها تحمل.. وطول فما فيه استقرار هنفضل نعمل كده”.
“اوعوا توصلوا بلدكم للخراب والدمار والتدمير”
وشدد السيسى : “علينا التأكيد على ضرورة الحفاظ على الدولة والناس والبيوت”، متابعا: “طبقا لتقرير الأمم المتحدة.. فيه دولة أنا مش هقول اسمها تحتاج إلى 440 مليار دولار لإعادة الشيء لأصله.. واللي كانت موجودة من 10 سنين.. والرقم اللي بتكلم عليه ده إحصائيات الأمم المتحدة.. إعادة الشيء للي كان عليه من 10 سنين.. التخريب والتدمير تحت شعار التغيير.. مطلوب لهذه الدولة 440 مليار دولار.. والرقم ده مش موجود ومش موجودين.. وتفضل البلد دي 50 سنة أو 100 سنة.. أصلها مش بالترميم.. أصلها بإصلاح الشعب نفسه”.
وأضاف: “أوعوا يا مصريين.. وأوعى يا أي حد بيسمعني في أي دولة أنه يوصل بلده للخراب والدمار والتدمير ده.. أوعوا تعملوا كده.. واللي بيعمل كده والقائمين عليهم.. تفتكروا أنتم مصلحين في الأرض ولا مفسدين.. ده إصلاح ولا إفساد.. لا يمكن يكون ده إصلاح.. ولا يمكن أن يقبل ربنا ده أو يساعد ده وعلشان كده مصر بفضل الله هتفضل مصر”.
