علقت الفنانة السورية سلاف فواخرجي، على القضية المعروفة إعلاميا بـ “قتيل منزل نانسي عجرم”، حيث نشرت صورة مجمعة في إطار واحد للفنانة اللبنانية وعائلتها، إلى جانب صورة القتيل وأولاده.
وكتبت سولاف على حسابها بموقع “إنستغرام”: ” القانون هو الفيصل، وفي ظالم وفي مظلوم، وفي عدالة على الأرض ولو بنسب قليلة، وفي عدالة بالسماء أكبر من كل النسب، كل الناس بتطلب رأي أو موقف من الفنان، والفنان جزء من المجتمع لازم يقول ويحكي أكيد، بس لما بتكون الامور لسا ما أكتملت صورتها، ولما بتكون بإيدين القضاء”
وأضافت :”نحنا مافينا نبت أو نعطي أحكام وقرارات ولابيجوز نتدخل لانو الحقيقة بعدها ما وضحت والقضية شائكة جدا، ولكل الناس اللي عم تطالبني بابداء الرأي بالقضية وكأنو قراري هو الحكم، أو لمجرد إثبات موقف أواللحاق بسبق السوشيال ميديا (والقصة مو هيك وأكبر من هيك ): أنا بوقف جنب الإنسان المظلوم بغض النظر عن جنسيته، ماحدا بيقبل بالظلم لا الو ولا لغيره، وصحيح السوري انظلم من اخوته كتير، بس التعميم غلط، وبكل بلد في صالح وفي طالح”.
وتابعت :”الجنسية متل الاسم مالو علاقة فيها البني اَدم بتخلق معه، والعنصريين وين ماكانوا هم ناس مريضين، وبوقف أكيد مع ابن بلدي بالحق ولو كان بآخر ماعمر الله، وكل نقطة دم منه هي من دمي، ولو نانسي ود.فادي مذنبين أكيد رح ياخدوا جزاءهم”.
واستكملت الفنانة السورية :”بس الموضوع أكبر مننا ومن تقييمنا، وماحدا قدر يعرفه، لحد هلأ عالقليلة، والأكيد كمان انو هنن مو مجرمين بالأصل ولا ساديين، بس في شي صار غلط وغير مقبول، وأكيد هنن عيلة منيحة ماسمعنا عنهم كلام سيء بيوم من الأيام، وعندهم عيلة وبنات، والڤيديوهات اللي عم تنزل والاغاني والشماتة مابتليق بإنسان تعرض لمصيبة بكل معنى الكلمة ولا بفنان بيوم من الايام قدم سعادة للناس”.
وأردفت: “مانو إله طبعا، وبيغلط وممكن يكون يتحول لمجرم بلحظة ما، بس مو باللحظة اللي وقع فيها نكون نحنا مجرمين، الله يرحم ابن بلدي ويصبر اهله وعيلته وولادو ، وولادو متل ولادي وولادنا كلنا. وان شاءالله بيرجع حقه كإنسان وبيفك الظلم عنه، واللي صار معه حفر بقلوبنا ألم ووجع مابيخلصوا”.
وأضافت: “والرب وحده اللي بيقتص من الظالم عاجلا أو اَجلا، اتركوا مناصب المحامين والقضاة وبعدوا عن كونكم أوصياء عالمجتمع، وكل واحد فينا عندو مية مشكلة ومية عيب، وكلنا معرضين بلحظة ما نكون مظلومين أو ظالمين، وأكيد في شي ماحدا بيعرفه صار، واللي صار أكبر من فن وشهرة”.
واختتمت سولاف بالقول: “عنا ثقة بالقضاء اللبناني وعنا ثقة بالمحامين السوريين المهمين اللي استلموا القضية وبكل المحامين العرب اللي اتطوعوا لكشف الحقيقة وتضامنوا مع #محمد_الموسى والهم كل الاحترام والتقدير، وعنا ثقة قبل كل شي بالله العادل والرحمن والرحيم، وخلوا البشر بحالهم ولايكونوا سلعة نسوقلها”.
https://www.instagram.com/p/B7Q6PvZn1M_/?igshid=1jkrwayb8of3z
يشار إلى أن الشاب السوري محمد الموسى قد لقي مصرعه علي يد الدكتور فادي الهاشم بـ١٧طلقة نارية، بعد أن تسلل إلى منزل الفنانة اللبنانية ملثماً بدافع السرقة، على حد أقوال نانسي عجرم وزوجها.
