لقيت طفلة لم تتجاوز التاسعة من عمرها حتفها إثر تعرضها لصعق بكابل كهربائي في شارع هارون الرشيد بمنطقة مصر الجديدة.
وفي التفاصيل، وفقاً لليوم السابع، خرجت الطفلة جنى لشراء خبز لأسرتها، إلا أن خبر موتها كان أسرع من عودتها. بعد أن تسبب كابل كهرباء في وفاتها ليتحول الشارع في تلك الليلة الممطرة إلى صراخ وكر وفر في محاولة بائسة من الاهالي والجيران لانقاذها.
وسرد الاب المكلوم تفاصيل يوم الحادث قائلا :”يوم الجمعة بعد إنتهاء الأمطار. جنى خرجت من البيت لشراء عيش، وهى معدية كان في تجمع لمياه المطر. أتزحلقت وقعت على وشها في المية. الناس جريت عشان تجيبها وتطلعها كانوا بيتكهربوا”.
وتابع رمضان :”كابل الكهرباء كان قريب من المياه، وأثناء محاولات الناس أنهم يطلعوها وقع كابل الكهربا فى المياه، والناس حاولت تجيبها بمساحات محدش عرف، لحد ما جابوا سلم خشب وطلعوا شد من شعرها. كانت توفت في خلال 3 دقائق تقريبا”.
وأضاف الأب :”مفروض في بلاغ أن مشكلة فى الكابل ده، يبقى يفصلوا الكهربا أثناء المطر، لكن محدش عمل كدة وشغلوا الكهربا من الساعة 3 الضهر”.
وعن يوم الحادث يقول والد الطفلة الضحية :”في اليوم ده قالتلي يابابا ماتروحش الشغل النهاردة، كأنها كانت حاسة أو كانت عايزاني أفضل جنبها”.
وأكد رمضان حسين :”وأنا في طريقي للشغل. أتصلوا بيا قالولي بنتك في المستشفي، روحت لقيتها جثة حضرتك، يرضى ربنا ده”.
واختتم الأب كلماته :”في شكاوى كتير راحت. مفروض عارفين أن في مشكلة في الأعمدة يبقى نفصل الكهرباء عنها في الأمطار، حتى بعد الأمطار بكام يوم كابل تاني وقع في شارع قريب من البيت. أنا عايز حقها وياريت ناخد بالنا عشان محدش يموت تاني”.
تحرك الجهات المختصة
تلقى قسم شرطة مصر الجديدة بلاغا بمصرع طفلة اثناء سيرها بشارع هارون الرشيد. وبانتقال الجهات المختصة إلى مكان الواقعة ومعاينة الجثة، تبين وفاة الطفلة ٨ اعوام. نتيجة صعقها بالكهرباء وخروج احشاء عمود انارة الامر الذى تسبب في صعقها ووفاتها في الحال.
أمرت النيابة العامة بتفريغ كاميرات المراقبة بمحل الواقعة لبيان سبب الوفاة. وعرض الطفلة المتوفاة على الطب الشرعي للتأكد من سبب وفاتها وعدم وجود اي شبهة جنائية في الحادث .