وجه الفنان اللبناني علاء زلزلي صرخة لجميع السياسيين اللبنانيين يحضهم فيها على الالتفات إلى الشعب اللبناني والوقوف إلى جانبه في مواجهة فيروس “كورونا” المستجد الذي انتشر في لبنان بالآونة الأخيرة مسجلاً أكثر من 50 إصابة.
وقال زلزلي في رسالته: «كلامي مش موجه للشعب اللبناني، كلامي اليوم موجه للزعما السياسيين ولزعما الأحزاب وزعما الطوائف، بما أنو الشعب اللبناني اليوم عم بواجه وباء عالمي وفيروس قاتل ممكن يحصد أرواح كتيره ؟؟ وبما انو أرواح اللبنانيين غالية وبما انو الشعب اللبناني أعطاكم كتير من حياتو ومن انتمائو المطلق ومن جيبتو ووصل معكم للتضحية بروحو وبروح عيلتو وولادو كرمال انتو تعيشوا وتكبروا وتتزعموا وتغنوا وتجمعوا أموال طائلة واملاك وسلطة».
متابعاً بالقول: «وبما انو لليوم بعدو ماشي وراكم بالدم وبالروح، اجا وقت تردو الجميل ومش بالدم وبالروح لا ردو الجميل بشوي من اموالكم اجمعوا من أموالكم وادعموا وجهزو المستشفيات الحكومية ولو ما بيستوعبوا جهزو مدارس رسميه بكل المناطق والقرى اللبنانية واعزلوها واستوردو الأجهزة اللازمة وجهزوها وما تخلو شعبكم يموت عالطرقات او لإن ما في امكانيات او من القلة، اي نعم بتقدرو ومن دون ما نطلب من حدا يساعدنا».
وختم زلزلي رسالته فكتب: «شعبنا الو حق عليكم ضحى بروحو كرمالكم مش كتير اذا ضحيتوا بأموالكم كرمالو ؟ اموالكم جمعتوها من ورا هالشعب ومن هالبلد، ومتل ما خايفين عليه وطلبتو منو يقعد بالبيت ويعزل حالو، خافوا عليه وما تخلوه يتبهدل، كونوا وطنيين وزعما وقادة حقيقيين وانسانيين وتأكدوا ما حدا ماخد معو شي ولا شي بيدوم الا رحمة رب العالمين اعملوا شي لأخرتكم الشعب اللبناني بيستاهل حتى اذا بدو يموت يموت عزيز، الله يحمي كل الشعب اللبناني ويحمي لبنان من كل شر ومرض، مواطن لبناني».
يذكر أن لبنان أعلنت مؤخراً عن تزايد عدد الإصابات بفيروس كورونا، متخذةً مجموعة من الإجراءات الوقائية للحد من تفشيه، كإغلاق حدودها مع دول الجوار، وتقييد حركة الطيران منها وإليها.
